ইজৰাইল-পেলেষ্টাইন সংঘাত

ইজৰাইল আৰু পেলেষ্টাইনৰ সংঘাতৰ ইতিহাস বহু পুৰণি। ইজৰাইলৰ জন্মলগ্নৰে পৰাই দুয়োখন দেশৰ মাজত সংঘাত চলি আহিছে। ইজৰাইল-পেলেষ্টাইন সংঘৰ্ষক ‘পৃথিৱীৰ আটাইতকৈ বেয়া সংঘৰ্ষ’ বুলি কোৱা হয়। জেৰুজালেম নামৰ ঠাইডোখৰৰ বাবে ইজৰাইল আৰু পেলেষ্টাইন দুয়োপক্ষৰ মাজত প্ৰায়ে সংঘৰ্ষৰ সূত্ৰপাত হৈ থাকে। ইহুদীসকলে তেওঁলোকৰ বাইবেল স্বীকৃত জন্মগত অধিকাৰ হিচাপে জেৰুজালেম ঠাইডোখৰ দাবী কৰে আৰু পেলেষ্টাইনীসকলে জেৰুজালেম ঠাইডোখৰক আত্মনিৰ্ণয়ৰ অধিকাৰ হিচাপে দাবী কৰে। দুয়োখন দেশৰ মাজত সংঘৰ্ষৰ সমাপ্তিৰ বাবে বাৰে বাৰে চেষ্টা কৰা স্বত্বেও কিন্তু বৰ্তমানলৈ দুয়োখন দেশৰ মাজত কোনো শান্তি-নিষ্পত্তি হোৱা দৃষ্টিগোচৰ হোৱা নাই। যোৱা কিছুদিনৰ পৰা ইজৰাইল আৰু পেলেষ্টাইনৰ মাজত সংঘৰ্ষৰ সুত্ৰপাত হৈছে। যি সংঘৰ্ষ বৰ্তমান এখন পূৰ্ণাংগ যুদ্ধৰ ফালে ধাৱমান হৈছে।

ইজৰাইল-পেলেষ্টাইন সংঘৰ্ষৰ ইতিহাস:-

ইহুদীসকলক তেওঁলোকৰ ধৰ্মীয় বিশ্বাস আৰু বিদেশী সংস্কৃতিৰ বাবে সমগ্ৰ ইতিহাসত অত্যাচাৰ কৰা হৈছিল। ১৮৯৭ চনত ইহুদীসকলে উৎপীড়নৰ পৰা পৰিত্ৰাণ পাবলৈ আৰু তেওঁলোকৰ মাতৃভূমি ইজৰাইলত নিজৰ ৰাজ্য স্থাপন কৰিবলৈ জায়নবাদী আন্দোলন নামৰ এক আন্দোলন আৰম্ভ কৰে। পেলেষ্টাইনত ইজৰাইল নামেৰে এখন ইহুদী ৰাষ্ট্ৰ স্থাপনৰ বাবে ওকালতি কৰিবলৈ “বিশ্ব জায়নবাদী সংগঠন” নামৰ এটা সংগঠনৰ সৃষ্টি কৰা হৈছিল। ফলস্বৰূপে,বিশ্বৰ বহু অঞ্চলৰ পৰা বহুসংখ্যক ইহুদী পেলেষ্টাইনলৈ প্ৰবজন কৰিবলৈ আৰম্ভ কৰে আৰু তেওঁলোকে পেলেষ্টাইনত ভূমি ক্ৰয় কৰে আৰু তাত ইহুদী বসতি স্থাপন কৰিবলৈ আৰম্ভ কৰে। ১৯১৭ চনত প্ৰথম বিশ্বযুদ্ধৰ সময়ত ইংলেণ্ড আৰু ফ্ৰান্সৰ মাজত হোৱা চাইকচ-পিকট চুক্তিৰ পিছতেই পেলেষ্টাইন ব্ৰিটিছৰ নিয়ন্ত্ৰণলৈ আহে। ইয়াৰ পৰাই পুৰণি অটোমান তুৰ্কী সাম্ৰাজ্যৰ বিভাজন হয়। পিছত বেলফোৰ ঘোষণাৰ জৰিয়তে ব্ৰিটিছ বৈদেশিক সচিব জেমছ বেলফোৰে ইহুদী সকলৰ বাবে পেলেষ্টাইনত এক সুকীয়া মাতৃভূমি স্থাপনৰ বাবে সন্মত হয়।

১৯৩০ ৰ দশকত জাৰ্মানীত নাজীসকলে ক্ষমতা লাভ কৰাৰ পিছত জাৰ্মানীৰ ইহুদীসকলৰ ওপৰত ভীষণ অত্যাচাৰ চলায় আৰু জাৰ্মানীৰ ইহুদীসকলে পেলেষ্টাইনলৈ প্ৰৱেশ কৰে। তাৰ লগে লগে ইউৰোপৰ পৰা হাজাৰ হাজাৰ ইহুদী পেলেষ্টাইনলৈ গৈ পুনৰ বসতি স্থাপন কৰে। পেলেষ্টাইনৰ আৰৱসকলে ইয়াক তেওঁলোকৰ মাতৃভূমিৰ বাবে ভাবুকিস্বৰূপে গণ্য কৰিছিল আৰু তেওঁলোকে ইহুদীসকলৰ বিৰুদ্ধে যুঁজিছিল। এই গৃহযুদ্ধত বহুতো লোকৰ মৃত্যু হৈছিল কিন্তু সেইসময়ত সাম্ৰাজ্যবাদী ব্ৰিটিছ চৰকাৰ তাত দুয়োপক্ষৰ যুদ্ধত মূক দৰ্শক হিচাপে আছিল আৰু পেলেষ্টাইনৰ হিংসা চৰম পৰ্য্যায়ত উপনীত হৈছিল।

১৯৪৭ চনত ব্ৰিটিছ চৰকাৰে কূটনৈতিকভাৱে পেলেষ্টাইনৰ ভৱিষ্যতৰ প্ৰশ্নটো ৰাষ্ট্ৰসংঘলৈ প্ৰেৰণ কৰিলে আৰু ৰাষ্ট্ৰসংঘৰ সাধাৰণ সভাই ১৮১ নং প্ৰস্তাৱ স্বেচ্ছাই প্ৰস্তুত কৰাৰ সময়ত বিতৰ্কিত অঞ্চলটোৰ এক দ্বি-ৰাজ্যিক সমাধান আৰম্ভ হৈছিল, যিয়ে জৰ্ডান নদীৰ পশ্চিমে পেলেষ্টাইনৰ পৰা এখন নতুন ৰাষ্ট্ৰ তৈয়াৰ কৰাৰ প্ৰস্তাৱ দিছিল: এখন ইহুদীৰ বাবে আৰু আনখন আৰৱৰ বাবে। আমেৰিকা যুক্তৰাষ্ট্ৰৰ কূটনৈতিক চাপৰ ফলস্বৰূপে ভোটদানৰ পিছত এই প্ৰস্তাৱ গ্ৰহণ কৰা হৈছিল, কিন্তু পেলেষ্টাইনীসকলে এই প্ৰস্তাৱ প্ৰত্যাখ্যান কৰিছিল,আৰু তেওঁলোকে যুক্তি দিছিল যে ইহুদী আৱাসীসকলৰ সেই সময়ত ৫.৫ শতাংশতকৈ অধিক ভূমি নাছিল আৰু সেয়েহে ইয়াৰ সৈতে থকা আন্তৰ্জাতিক বৈধতাৰ উপৰিও ৫৬ শতাংশ লাভ কৰাৰ কোনো অধিকাৰ নাছিল। ইহুদীসকলৰ উল্লাস আৰৱসকলৰ শত্ৰুতাৰ সৈতে মিলিত হৈছিল আৰু ইহুদী আৰু আৰৱসকলৰ মাজত গৃহযুদ্ধ আৰম্ভ হৈছিল।

ব্ৰিটিছ গণভোটৰ সমাপ্তিৰ লগে লগে ৰাষ্ট্ৰসংঘৰ প্ৰস্তাৱ অনুসৰি ১৯৪৮ চনৰ ১৪ মে’ত প্ৰধানমন্ত্ৰী ডেভিদ বেন-গুৰিয়নৰ অধীনত ইজৰাইল ৰাজ্য প্ৰতিষ্ঠা কৰা হৈছিল আৰু আমেৰিকা যুক্তৰাষ্ট্ৰ আৰু ছোভিয়েট ইউনিয়নৰ পৰা ইজৰাইলে তাৎক্ষণিক স্বীকৃতি লাভ কৰে।

আৰৱ-ইজৰাইল যুদ্ধ(১৯৪৮-৪৯) :-

ইজৰাইলৰ স্বাধীনতা ঘোষণাই আৰৱ দেশসমূহৰ মাজত এক সম্পূৰ্ণ যুদ্ধৰ সৃষ্টি কৰে যি ১৯৪৮ চনৰ ১৪ মে’ৰ পিছত আৰম্ভ হয়। ১৫-১৬ মে’ত জৰ্ডান, চিৰিয়া, ইজিপ্ত আৰু ইৰাক এই চাৰিখন দেশৰ চাৰিটা সৈন্যবাহিনীয়ে এই যুদ্ধত যোগদান কৰে। ইজৰাইল আৰু আৰৱ দেশসমূহৰ মাজত হোৱা যুদ্ধৰ শেষত ইজৰাইল বিজয়ী হৈ উঠিল। তদুপৰি, ই ইয়াৰ ভূখণ্ড অধিক পৰিমাণে বৃদ্ধি কৰিব পাৰে আৰু ই ইজৰাইলৰ সম্প্ৰসাৰণবাদী নীতিৰ আৰম্ভণি চিহ্নিত কৰে। যুদ্ধৰ ফলস্বৰূপে, বহু সংখ্যক পেলেষ্টাইনী পলাই যায় আৰু বহুসংখ্যক ইজৰাইলৰ পৰা আঁতৰি আহি ইজৰাইলৰ সীমান্তৰ ওচৰৰ শৰণাৰ্থী শিবিৰত বসতি স্থাপন কৰিবলৈ বাধ্য হয়। এইটোয়েই পেলেষ্টাইন শৰণাৰ্থী সংকটৰ আৰম্ভণি আছিল যাৰ ফলত অৱশেষত ১৯৬৪ চনত এটা সন্ত্ৰাসবাদী সংগঠন পিএলঅ’ (পেলেষ্টাইন লিবাৰেচন অৰ্গেনাইজেচন)ৰ সৃষ্টি হৈছিল।

আৰৱ-ইজৰাইল যুদ্ধ(১৯৬৭):-

১৯৬৭ চনত ইজৰাইলে ইজিপ্ত, চিৰিয়া আৰু জৰ্ডানৰ বিৰুদ্ধে এক প্ৰাৰম্ভিক আক্ৰমণ আৰম্ভ কৰে আৰু আমেৰিকা যুক্তৰাষ্ট্ৰৰ সহায়ত মাত্ৰ ছদিনত ইজৰাইলে এই দেশ চাৰিখনক পৰাস্ত কৰে। এই ছয় দিনীয়া যুদ্ধৰ শেষত ইজৰাইলে আন দেশসমূহৰ পৰা কেইখনমান ঠাই দখল কৰিছিল। সেই ঠাইসমূহ আছিল :-

১) চিৰিয়াৰ পৰা গোলান হাইটছ।
২) জৰ্ডানৰ পৰা পশ্চিম তীৰ(ৱেষ্ট বেংক) আৰু পূব জেৰুজালেম।
৩) ইজিপ্তৰ পৰা চিনাই উপদ্বীপ আৰু গাজা ষ্ট্ৰিপ।

১৯৬৭ চনৰ আৰৱ-ইজৰাইল যুদ্ধ আজিৰ সংঘৰ্ষৰ বাবে বিশেষভাৱে গুৰুত্বপূৰ্ণ, কিয়নো ই ইজৰাইলক পশ্চিম তীৰ(ৱেষ্ট বেংক) আৰু গাজা ষ্ট্ৰিপৰ নিয়ন্ত্ৰণত ৰাখিছিল,য’ত অঞ্চলত বৃহৎ সংখ্যক পেলেষ্টাইনী বাস কৰিছিল। ১৯৬৭ চনৰ যুদ্ধৰ পিছত গাজা ষ্ট্ৰিপ আৰু ৱেষ্ট বেংকক একেলগে ‘অধিকৃত অঞ্চল’ বুলি জনা গৈছিল।

ৰাষ্ট্ৰসংঘৰ হস্তক্ষেপ :-

ৰাষ্ট্ৰসংঘৰ চনদ অনুসৰি,ৰাষ্ট্ৰসংঘৰ সদস্য ৰাষ্ট্ৰৰ যুদ্ধৰ পৰা আইনগতভাৱে কোনো আঞ্চলিক লাভ হ’ব নোৱাৰে, আনকি আত্মৰক্ষাৰ বাবেও আন ৰাজ্য দখল কৰিব নোৱাৰে। সেয়েহে,ছয় দিনীয়া যুদ্ধৰ প্ৰতিক্ৰিয়াস্বৰূপে, ৰাষ্ট্ৰসংঘৰ নিৰাপত্তা পৰিষদে ‘শান্তিৰ বাবে ভূমি’ৰ বাবে এক প্ৰস্তাৱ গ্ৰহণ কৰে আৰু ইজৰাইলে দখল কৰা অঞ্চলবোৰ পৰাজিত ৰাষ্ট্ৰসমূহক ঘূৰাই দিয়াটো ৰাষ্ট্ৰসংঘই বাধ্যতামূলক কৰে। ইজৰাইলে দখল কৰা অঞ্চলসমূহ ঘূৰাই দিবলৈ অনীহা প্ৰকাশ কৰাৰ পৰিপ্ৰেক্ষিতত, ১৯৭৩ চনত আন এক আৰৱ-ইজৰাইল যুদ্ধ আৰম্ভ হয়। এই যুদ্ধক ইয়ম কিপ্পুৰ যুদ্ধ বুলি কোৱা হয়। এই যুদ্ধত ইজৰাইল কিছু বিফলতাৰ সন্মুখীন হৈছিল।

১৯৭৯ চনত ইজৰাইল-ইজিপ্তে শান্তি চুক্তি স্বাক্ষৰ কৰে,সেই অনুসৰি ইজৰাইলে ১৯৮২ চনত ইজৰাইলে ইজিপ্তক চিনাই উপদ্বীপ ঘূৰাই দিয়ে আৰু ইজিপ্তে ইজৰাইলক আনুষ্ঠানিকভাৱে ৰাষ্ট্ৰৰূপে স্বীকৃতি দিছে আৰু এই স্বীকৃতি দিয়া প্ৰথম আৰৱ ৰাষ্ট্ৰ হিচাপে পৰিগণিত হয়।

হামাচ আৰু ফাতাহ:-

১৯৮৭ চনত জেহাদৰ জৰিয়তে পেলেষ্টাইনৰ মুক্তিৰ বাবে হামাচ নামৰ ইছলামিক উগ্ৰপন্থী গোটটো অস্তিত্বলৈ আহে। ই ইজৰাইলক এখন দেশ হিচাপে স্বীকৃতি দিবলৈ অস্বীকাৰ কৰিছিল। ই ইৰাণ আৰু চিৰিয়াৰ পৰা সমৰ্থন লাভ কৰিছিল। আনহাতে, ইয়াছেৰ আৰাফাতৰ অধীনত পিএলঅ’ৰ এটা গোট ফাতাহে পশ্চিমীয়া ৰাষ্ট্ৰসমূহৰ পৰা সমৰ্থন লাভ কৰে।

ইজৰাইলৰ অধিকাৰৰ বিৰুদ্ধে বিদ্ৰোহ:-

প্ৰথম ইন্তিফাদা: পশ্চিম তীৰ(ৱেষ্ট বেংক) আৰু গাজা ষ্ট্ৰিপত ইজৰাইলৰ বসতি বৃদ্ধিৰ লগে লগে ইজৰাইল আৰু পেলেষ্টাইনৰ মাজত উত্তেজনা বৃদ্ধি পাইছিল। পশ্চিম তীৰ(ৱেষ্ট বেংক) আৰু গাজা ষ্ট্ৰিপত বাস কৰা পেলেষ্টাইনীসকলে ১৯৮৭ চনত বিদ্ৰোহ আৰম্ভ হৈছিল, ইয়াক প্ৰথম ইন্তিফাদা(বিদ্ৰোহ) বুলি জনা যায়। অছলো শান্তি চুক্তি: 1993 চনত আমেৰিকা যুক্তৰাষ্ট্ৰ আৰু ৰাছিয়াৰ মধ্যস্থতাৰ সৈতে, ইজৰাইল আৰু পিএলঅ’য়ে অছলো শান্তি চুক্তিত স্বাক্ষৰ কৰে যি দুটা ৰাজ্যিক সমাধানৰ ধাৰণাৰ ওপৰত আধাৰিত আছিল। পেলেষ্টাইন আৰু ইজৰাইলে ঘোষণাপত্ৰত স্বাক্ষৰ কৰিছিল – য’ত দুয়োখন ৰাষ্ট্ৰই স্বায়ত্তশাসিত পৰিচালনা সংস্থা হিচাপে স্বীকৃতি বিচাৰে। পিএলঅ’য়ে ইজৰাইলক স্বীকৃতি প্ৰদান কৰে। আৰু ইজৰাইলেও পিএলঅ’ৰ ‘অধিকৃত অঞ্চলসমূহ’ক স্বাধীনতা দিবলৈ সন্মত হৈছিল। কিন্তু সেই অঞ্চলসমূহ ইজৰাইলৰ অধীনতে আছিল।

কেম্প ডেভিড সন্মিলন (২০০০):

ইয়াৰ উদ্দেশ্য আছিল দুয়োপক্ষক অৱশেষত মীমাংসাৰ ক্ষেত্ৰত সন্মত কৰা, কিন্তু অৱশেষত আলোচনা বিফল হয়। আৰু ইয়াৰ ফলত দ্বিতীয় ইন্তিফাদা হৈছিল।

দ্বিতীয় ইন্তিফাদা (২০০০-০৫):

২০০০ চনত, অধিক হিংসাত্মকভাৱে পেলেষ্টাইন বিদ্ৰোহ আৰম্ভ হয় আৰু দুয়োফালে বৃহৎ সংখ্যক নাগৰিকৰ মৃত্যু হয়। ইয়াক দ্বিতীয় ইন্তিফাদা বুলি কোৱা হয়। এক প্ৰতিৰক্ষামূলক পদক্ষেপ হিচাপে, ইজৰাইলে ইজৰাইল আৰু পেলেষ্টাইন বসতি পৃথক কৰিবলৈ পশ্চিম তীৰৰ কাষত এখন প্ৰাচীৰ নিৰ্মাণ কৰিছিল।

গাজা বহিষ্কাৰ পৰিকল্পনা: এইটো ইজৰাইলৰ একপক্ষীয় নিৰস্ত্ৰীকৰণ পৰিকল্পনা যাৰ দ্বাৰা ২০০৫ চনত ইজৰাইলৰ প্ৰতিৰক্ষা বাহিনীয়ে গাজা ভূখণ্ড আৰু উত্তৰ পশ্চিম তীৰৰ চাৰিটা বসতি ত্যাগ কৰে।

হামাচ আৰু ফাতাহৰ মাজত বিবাদ:-

অছলো চুক্তিৰ পিছত, অধিকৃত অঞ্চলবোৰত সীমিত স্ব-শাসন ক্ষমতাৰ সৈতে এটা ফিলিস্তিনি কৰ্তৃপক্ষ (পিএ) সৃষ্টি কৰা হৈছিল। কিন্তু ইয়াৰ ফলত ৰাজনৈতিক ক্ষমতাৰ বাবে হামাস আৰু ফাতাহৰ মাজত বিবাদ হৈছিল। হামাচ – অছলো শান্তি চুক্তিৰ প্ৰস্তাৱ গ্ৰহণ নকৰিলে। তেওঁলোকে গোটেই ৰাজ্য তেওঁলোকৰ অধীনত থকাটো বিচাৰে। তেওঁলোকে গাজা নিয়ন্ত্ৰণ কৰে। হামাচক ইৰাণে সমৰ্থন কৰে। ফাতাহ – অছলো শান্তি চুক্তি আৰু ইয়াৰ চৰ্তসমূহ ফাতাহে গ্ৰহণ কৰিলে। তেওঁলোকে ৱেষ্ট বেংক নিয়ন্ত্ৰণ কৰে।

২০০৬ চনত হামাচে পেলেষ্টাইনৰ নিৰ্বাচনত জয়লাভ কৰে কিন্তু ইয়াৰ পাছতেই ক্ষমতাৰ বাবে ফাতাহ আৰু হামাচৰ মাজত উত্তেজনা তীব্ৰতৰ হৈ উঠে। এক দীঘলীয়া সশস্ত্ৰ সংগ্ৰামৰ পিছত, 2011 চনত পেলেষ্টাইনী প্ৰতিদ্বন্দী ফাতাহ আৰু হামাছে এক মীমাংসা চুক্তিত স্বাক্ষৰ কৰে। বৰ্তমান, গাজা ফাতাহৰ দ্বাৰা আৰু পেলেষ্টাইন আৰু পশ্চিম তীৰ(ৱেষ্ট বেংক) অঞ্চল হামাচৰ দ্বাৰা নিয়ন্ত্ৰণ কৰা হয়।

বৰ্তমানৰ ইজৰাইল-পেলেষ্টাইন সংঘাত:-

বৰ্তমান ইজৰাইল আৰু পেলেষ্টাইনৰ মাজৰ এই ৰক্তাক্ত সংঘৰ্ষৰ কাৰণ হৈছে ইজৰাইলৰ উচ্চতম ন্যায়ালয়ৰ এটা ৰায়। ২০২১ চনৰ ৬ মে তাৰিখে পূব জেৰুজালেমৰ চুবুৰীয়া শ্বেখ জাৰাহৰপৰা চাৰিটা পেলেষ্টাইনী পৰিয়ালক উচ্ছেদ কৰাৰ সন্দৰ্ভত ইজৰাইলৰ উচ্চতম ন্যায়ালয়ৰ সিদ্ধান্তক লৈ পেলেষ্টাইনীসকলে জেৰুজালেমত প্ৰতিবাদ আৰম্ভ কৰে আৰু এই প্ৰতিবাদৰ ফলত ইহুদী আৰু পেলেষ্টাইনী প্ৰতিবাদকাৰীসকলৰ মাজত অতি শীঘ্ৰে হিংসাত্মক ৰূপৰ সূচনা হয়। পৰৱৰ্তী দিনা ইজৰাইলী সেনাবাহিনীয়ে এই ৰমজান মাহৰ পবিত্ৰ দিনতে ইছলামধৰ্মীসকলৰ পবিত্ৰ তীৰ্থস্থান আল-আকছা মছজিদৰ চৌহদত আক্ৰমণ কৰে।

Embed from Getty Images

গাজাৰ এক দৃশ্য

ইহুদী আৰু পেলেষ্টাইনীসকলৰ মাজত সংঘটিত এই হিংসাত্মক ঘটনাৰ পাছতেই ইছলামধৰ্মীসকলৰ পবিত্ৰ দিন লাইলাত আল-কাদৰ আৰু ইজৰাইলৰ ৰাষ্ট্ৰীয় বন্ধৰ দিন জেৰুজালেম দিৱস(৯ মে’)ৰ দিনটোতেই ভয়াৱহ হিংসাত্মক ঘটনা সংঘটিত হৈছিল। ইয়াত সংঘটিত হিংসাত্মক কাৰ্য্যত ৩০০ তকৈও অধিক লোক আহত হৈছিল,যাৰ ভিতৰত অধিকাংশই আছিল পেলেষ্টাইনী। এই ঘটনাই আন্তৰ্জাতিক মহলৰ দৃষ্টি আকৰ্ষণ কৰিছিল। ইয়াৰ ফলত ইজৰাইলৰ উচ্চতম ন্যায়ালয়ে তেওঁলোকৰ ৰায়টো ৩০ দিনৰ বাবে স্থগিত ঘোষণা কৰিছিল।

পৰৱৰ্তী দিনা ১০ মে’ত হামাচ আৰু পেলেষ্টাইনী ইছলামিক জিহাদ নামৰ দুটা পেলেষ্টাইনী উগ্ৰপন্থী সংগঠনে গাজা ষ্ট্ৰিপৰ পৰা ইজৰাইললৈ ৰকেট নিক্ষেপ কৰা আৰম্ভ কৰে আৰু এই ৰকেটে ইজৰাইলৰ একাধিক বাসগৃহ আৰু এখন বিদ্যালয়ত আঘাত কৰে। ইজৰাইলে গাজা ষ্ট্ৰিপৰ বিৰুদ্ধে বিমান আক্ৰমণ আৰম্ভ কৰে আৰু তাৰ ভিতৰত একাধিক অট্টালিকাক লক্ষ্য কৰি বিমান আক্ৰমণ আৰম্ভ কৰে। আৰু তাৰ পৰাই আৰম্ভ হয় ইজৰাইল- পেলেষ্টাইনৰ সংঘাত।

ইজৰাইল আৰু পেলেষ্টাইনৰ সংঘৰ্ষই বৰ্তমান দ্বিতীয় সপ্তাহত প্ৰৱেশ কৰিছে আৰু দুয়োখন দেশ এই সংঘৰ্ষৰ ফলত ভয়াৱহভাৱে ক্ষতিগ্ৰস্ত হৈছে। গাজাৰ স্বাস্থ্য মন্ত্ৰালয়ৰ মতে,বৰ্তমানলৈকে গাজাত ২১২ জন পেলেষ্টাইনী লোক নিহত হৈছে তাৰ ভিতৰত ৬১ টাই শিশু আৰু ৩৬ গৰাকী মহিলা। লগতে বৰ্তমানলৈ ১,২৩৫ জনৰো অধিক লোক আহত হৈছে।লগতে পশ্চিম তীৰ(ৱেষ্ট বেংক)ত বৰ্তমানলৈকে পোন্ধৰ(১৫) জন পেলেষ্টাইনী লোক নিহত হৈছে। ইয়াৰ সমান্তৰালকৈ ইজৰাইলত মৃত্যু হোৱা মানুহৰ সংখ্যা কিছু কম। বৰ্তমানলৈ পেলেষ্টাইনৰ আক্ৰমণত ৰকেট আক্ৰমণত ইজৰাইলৰ দহ(১০) জন লোক নিহত হৈছে। বৰ্তমান ৰাষ্ট্ৰসংঘৰ লগতে আমেৰিকা যুক্তৰাষ্ট্ৰ,ইজিপ্ত,জৰ্ডান আদিকে ধৰি বিশ্বৰ প্ৰায় সকলো দেশেই ইজৰাইল আৰু পেলেষ্টাইনক যুদ্ধবিৰতিৰ আশ্ৰয় লবলৈ আহ্বান জনাইছে।

১০ মে’ত আৰম্ভ হোৱা ইজৰাইল-পেলেষ্টাইনৰ মাজৰ এই যুঁজত ইজৰাইলী বাহিনীয়ে গাজা ষ্ট্ৰিপত প্ৰায় ৭৬৬ টা লক্ষ্যত আঘাত কৰিছে।সমান্তৰালকৈ ইজৰাইলী অঞ্চলত পেলেষ্টাইনৰ পৰা প্ৰায় প্ৰায় 3,200 ৰকেট নিক্ষেপ কৰা হৈছে। ইজৰাইল-পেলেষ্টাইনৰ এই সংঘাত বৰ্তমান সময়ত সমগ্ৰ বিশ্বৰ বাবে চিন্তনীয় হৈ উঠিছে। ইয়াতে যদি এই সংঘাতৰ অৱসান ঘটোৱা নহয় ভৱিষ্যতে ইজৰাইল-পেলেষ্টাইনৰ এই সংঘৰ্ষই সমগ্ৰ বিশ্বতে বিৰূপ প্ৰভাৱ পেলাব। এইক্ষেত্ৰত ৰাষ্ট্ৰসংঘৰ হস্তক্ষেপৰ অত্যন্ত প্ৰয়োজন। দুয়োখন দেশৰ সম্পৰ্কৰ তিক্ততাৰ অৱসান ঘটাব নোৱাৰিলে ভৱিষ্যতে দুয়োখন দেশৰেই ধন-জনৰ ক্ষতি হ’ব। ইজৰাইল আৰু পেলেষ্টাইন দুয়োখন দেশেই আগবাঢ়ি আহি শান্তিৰ পথেৰে আগুৱাই যাব লাগিব।